ଇସ୍ରାଏଲ-ଇରାନ ସଂଘର୍ଷ: ‘ଅପରେସନ ସିନ୍ଧୁ’ ମାଧ୍ୟମରେ ଭାରତୀୟଙ୍କୁ ଉଦ୍ଧାର ଯୋଜନା

ନୂଆଦିଲ୍ଲୀ: ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ସଂଘର୍ଷ ଯୋଗୁଁ ଉତ୍ତେଜନା ବୃଦ୍ଧି ପାଇବା ପରେ ଭାରତ ସରକାର ଇସ୍ରାଏଲରେ ଥିବା ଭାରତୀୟ ନାଗରିକମାନଙ୍କୁ ସୁରକ୍ଷିତ ଉଦ୍ଧାର କରିବା ପାଇଁ ‘ଅପରେସନ ସିନ୍ଧୁ’ ଆରମ୍ଭ କରିଛନ୍ତି। ବୈଦେଶିକ ମନ୍ତ୍ରଣାଳୟ (ଏମଇଏ) ଗୁରୁବାର ଏହି ଯୋଜନା ଘୋଷଣା କରି କହିଛି ଯେ ତେଲ ଆବିବରେ ଥିବା ଭାରତୀୟ ଦୂତାବାସ ଏହି କାର୍ଯ୍ୟକ୍ରମରେ ସମ୍ପୂର୍ଣ୍ଣ ସହାୟତା ପ୍ରଦାନ କରିବ।

ଏମଇଏ ଏକ ବିବୃତିରେ କହିଛି, “ଇସ୍ରାଏଲରେ ଥିବା ଏବଂ ଘରକୁ ଫେରିବାକୁ ଇଚ୍ଛୁକ ଭାରତୀୟ ନାଗରିକମାନଙ୍କୁ ଉଦ୍ଧାର କରିବା ପାଇଁ ତେଲ ଆବିବସ୍ଥିତ ଭାରତୀୟ ଦୂତାବାସ ସମସ୍ତ ଆବଶ୍ୟକୀୟ ବ୍ୟବସ୍ଥା କରିବ। ସମସ୍ତେ ନିଜକୁ ଦୂତାବାସରେ ପଞ୍ଜିକରଣ କରିବାକୁ ଅନୁରୋଧ କରାଯାଉଛି।” ପଞ୍ଜିକରଣ ପାଇଁ ଭାରତୀୟ ନାଗରିକମାନେ https://www.indembassyisrael.gov.in/indian_national_reg ଲିଙ୍କ ବ୍ୟବହାର କରିପାରିବେ।

ମନ୍ତ୍ରଣାଳୟ ଆହୁରି କହିଛି ଯେ କୌଣସି ସହାୟତା କିମ୍ବା ପ୍ରଶ୍ନ ପାଇଁ ଭାରତୀୟ ନାଗରିକମାନେ ତେଲ ଆବିବ ଦୂତାବାସର ୨୪/୭ ନିୟନ୍ତ୍ରଣ କକ୍ଷ ସହିତ ଯୋଗାଯୋଗ କରିପାରିବେ। ଯୋଗାଯୋଗ ନମ୍ବରଗୁଡ଼ିକ ହେଉଛି: +୯୭୨ ୫୪-୭୫୨୦୭୧୧, +୯୭୨ ୫୪-୩୨୭୮୩୯୨; ଇମେଲ: cons1.telaviv@mea.gov.in।

ଇସ୍ରାଏଲରେ ଥିବା ଭାରତୀୟ ଦୂତାବାସ ପୂର୍ବରୁ ଜାରି କରିଥିବା ଚେତାବନୀକୁ ପୁନର୍ବାର ଜାରି କରି ସମସ୍ତ ଭାରତୀୟ ନାଗରିକଙ୍କୁ ସତର୍କ ରହିବାକୁ ଏବଂ ଇସ୍ରାଏଲୀୟ କର୍ତ୍ତୃପକ୍ଷଙ୍କ ସୁରକ୍ଷା ନିର୍ଦ୍ଦେଶାବଳୀ କଡ଼ାକଡ଼ି ପାଳନ କରିବାକୁ ଅନୁରୋଧ କରିଛି।

ଏମଇଏ ଆଶ୍ୱାସନା ଦେଇଛି ଯେ ଭାରତ ସରକାର ବିଦେଶରେ ଥିବା ନାଗରିକମାନଙ୍କ ସୁରକ୍ଷାକୁ ସର୍ବୋଚ୍ଚ ଅଗ୍ରାଧିକାର ଦେଇଥାଏ। ମନ୍ତ୍ରଣାଳୟ କହିଛି, “ଆମେ ପରିସ୍ଥିତିକୁ ନିରନ୍ତର ନୀରିକ୍ଷଣ କରୁଛୁ। ଦୂତାବାସ ଭାରତୀୟ ସମୁଦାୟ ସହିତ ସମ୍ପର୍କ ରଖି ସମସ୍ତ ସମ୍ଭାବ୍ୟ ସହାୟତା ପ୍ରଦାନ କରିବ।”

ଗୁରୁବାର ପୂର୍ବରୁ ‘ଅପରେସନ ସିନ୍ଧୁ’ ଅଧୀନରେ ଉତ୍ତର ଇରାନରୁ ୧୧୦ ଜଣ ଛାତ୍ରଙ୍କୁ ଉଦ୍ଧାର କରାଯାଇ ଭାରତକୁ ଫେରାଯାଇଛି। ଗତ ସପ୍ତାହରେ ଆରମ୍ଭ ହୋଇଥିବା ଏହି ସଂଘର୍ଷରେ ଇସ୍ରାଏଲ ଓ ଇରାନ ପରସ୍ପର ବିରୁଦ୍ଧରେ ମିସାଇଲ ଏବଂ ଡ୍ରୋନ ଆକ୍ରମଣ ଜାରି ରଖିଛନ୍ତି, ଯାହା ଦ୍ୱାରା ସୈନ୍ୟ ଓ ନ୍ୟୁକ୍ଲିୟର ସ୍ଥାନଗୁଡ଼ିକୁ ଟାର୍ଗେଟ କରାଯାଉଛି।

ଏହି ଉତ୍ତେଜନାପୂର୍ଣ୍ଣ ପରିସ୍ଥିତି ମଧ୍ୟରେ ଭାରତ ସରକାରଙ୍କ ଏହି ପଦକ୍ଷେପ ଇସ୍ରଏଲରେ ଥିବା ଭାରତୀୟଙ ନାଗରିକମାନଙ୍କ ପାଇଁ ଏକ ଆଶ୍ୱାସନା ଆଣିଛି।